جوز في اجازه
على قد ما بتطول أيامي
بتقصر في خيالك , وخيالي
خيّالِك ,
والبال مش خالي
من شوقي ليكي بكون مُحرَج
وحصاني رجيل
لكن أعرج
كترت مواويل مني بتخرج
ولكنّي خيّال مش خايل
ولا عندي أيتها مهارة
لا بجري , ولا أنط
عشقاني ومنتظرة أمارة
مفهمتش إنّك غيّارة
مش أنثى ...!!
محتاجة الونسة
مركب بتعوم
علشان ترسى
محتاجة لشط
وأنا لسّة
نايم في الخط
****
سامحيني إن كنت عليكي جنيت
وجنيت من شجرك ثمراتك
ولكني نويت
أفضل عدودة "ف" حكاياتك
غنيوة كسرها الهمّ
والعجز المتبعتر في الدم
سامحيني إن لم..
جيتلك بدري
مش فقري
(لكن أزمتي صغري )؟
ملحقتش أتخطى حواجز
ملحقتش أعمل أرضية
كان نفسي تكوني مَرضيّة
"ف" حياتك جملة اعتراضيّة
مجرد خيط
برواز على حيط
مالهوش عازة
جوز في أجازة
مفتاح عطلان
ولسّاكي..
منتظرة أمارة
غلطان
لو قلت : أنا خيّالك
أوسبتك عايمة "ف" خيالك
هقابلك لكن ع الواقع
مع إني لودّك مش قاطع
مضطر أبيعك
بخسارة .
شعر /أحمد عبدالفتاح العوامري
إقرأ أيضاً :
شعر/ أنا الغالبه شعر / أراهنك كلمات قصائد شعر حجر تفاح شعر/ ياريتك جوا كراريس العيال تعريف جديد للوحدة متزعليش جوهرة ياريته قال قّطع على جسمه الخَلَق الكعكه الفاتحه .. للخاينه سكته حُبيّه باكهرب العواميد