معلومات عن صيد السمك وأساسيات التعامل في رحلات الصيد
محتوى المقال :
- أسئلة وإحابات (معلومات عن صيد الاسماك )
- دور الريس والبحرية في الرحلة
- اساسيات التعامل في الرحلة
- المطلوب من طاقم اللنش والمطلوب من أفراد الرحلة .
هاكتب عن الموضوع رداً على أحد الزملاء وبحكم خبرتي في البحر وكوني هاوي الصيد وبحكم اني (كنت) صاحب مركب لرحلات الصيد
أسئلة واجابات حول صيد الأسماك
1 – ايه هى الاوقات اللى بينام فيها طاقم المركب ومن حقه انه يتوقف فيها عن خدمة اعضاء الرحلة . مثال .. لو سهرانين فى مكان والريس دخل ينام الساعة 1 صباحا وجت الساعة 4 والدنيا مريحه وعايزين ننقل .. نصحيه ولا نسيبه نايم؟
انت كصياد طالع رحلة فلازم تعيش الرحلة بمفهومها وأخلاقها ، الريس انسان ولازم ينام في اليوم من 6- 8 ساعات انت طبعاً جاي رحلة كل سنه مرة فبتحب تصحى التلات ايام بتوع الرحلة (وفي ناس للأسف بتتعاطى اقراص علشان تفضل صاحية طول الرحلة ) لكن الريس دا اكل عيشه وعايش في المركب يعني من حقه ينام من 6- 8 ساعات في اليوم هو والبحرية ويقسمها بطريقته علشان محدش بينوم نفسه غصب النوم احتياج بيولوجي ولما يحضر لازم تلبي ولكن هو يحاول يراعي الرحلة بمعنى انه يحاول يختار الوقت اللي في الضهرية والسمك مش بياكل وهو واقف على طرحة شغالة او لما يدخل الكنة وبرضو مينامش 8 ساعات متصلة يعني مثلا ساعتين الضهر و4ساعات بالليل .
2 – لو طالع رحلة المفروض اظبط الطرحات اللى هيطرح فيها الريس ولا اسيبه يشتغل هو بدماغة .. يعنى مثلا عند حجز الرحلة اظبط معاه خط سير الرحلة من الطرحات المتسجلة والمعروفة على البرامج ولا لأ ؟
لو انت طالع رحلة فطبيعي انك مش بتطلع كل يوم لكن الريس بيطلع كل يوم ودارس الارض والطرحات اكتر منك أكيد فسيبه هو يحدد سير الرحلة
مثال اخر :
هنشتغل جيج فين وهنسقط هنا وهنشتغل كاستينج هنا وهكذا؟
الموضوع دا بيعتمد على خبرتك كصياد الريس لما بيبقى عارف ان الناس اللي معاه فاهمة هو بيرتاح وهما بيرتاحو ، وسيبه هو اللي يحدد دي حسب الطرحات والأعماق
3 – لو واقفين فى مكان ما والوزفة حضرت .. كنت شوفت بوست قبل كده ان لما الوزفة تحضر معناها ان الخير جاى والمفروض مننقلش من المكان حتى لو طولنا .. عايز اعرف نطول قد ايه مثلا لو المعلومه صحيحه ؟
الوزفه مش بتستقر في مكان هى بتبقى ماشية وتعدي عندك لو ليك رزق هتاخده لأنك هتلاقي وراها البياض والتونه والبراكودا والأسماك السطحية بس دا مش معناه انك تعيش في المكان دا يعني ساعة زمن لو مفيش شغل اتوكل على الله .
4 – ايه علاقة المد والجزر بالطرحة اللى المفروض نقف عليها .. مثال .. سمعت ان مع المد نشتغل غزير ومع الجزر نشتغل عوارى .. هل الكلام ده صحيح ولا على حسب الارض اللى شغالين عليها ؟
المد والجذر لا علاقة وطيدة بالصيد لان الأسماك لها سلوك معين عند المد وعند الجزر
مع المد بيحصل تيارات قوية للميه فتتجه الأسماك للعواري علشان تتغذى ودي بتتسمي ايام حمل اللي بيكون فيها المد عالي والتيارات قوية وبيفضل فيها صيد الشاطئ وصيد العواري ومع الجزر يحصل العكس منسوب الميه ينخفض فيتجه السمك للغزير ودي بتتسمى ايام فساد ويفضل فيها صيد المراكب
5 – ايه مفهوم العوارى والغزير يعنى العوارى كام متر والغزير كام متر ؟
دي مسألة نسبية في تحديدها ولكن نقدر نقول ان العواري اعماق من 40 ولفوق وغزير من 60 متر فمثلاً في ناس بتحب الصيد في بحر من 60 ولتحت وناس العكس
6 - يعنى ايه المد مبحر والمد مشيع .. اعرف منين وايه تأثيره على الصيد ؟
دي مصطلحات حسب اللهجات والصيادين بيعرفوها يعني مثلاً المد مشيع معناه ان التيارات المائية قوية وفيه بتتعب في الصيد علشان بتكون مضطر تزود التقل علشان توصل السن بالطعم للأرض
7 – المفروض ان المد والجزر اللى اعرفه مرتبط بطلوع و نزول القمر .. ازاى فى نفس الوقت ممكن تلاقى المد شديد فى مكان وهادى فى مكان تانى ؟
عمق المكان بيأثر على قوة التيارات المائية اللي بيطلق عليها مجازاً المد شديد يعتي مثلا في المراسي بتلاقي مفيش تيارات شديدة بعكس البحر المفتوح بتلاقي التيارات شديدة
8 – هل صحيح اننا فى ايام الحمل نشتغل عوارى وفى ايام الفساد نشتغل غزير ؟
نعم صحيح ايام الحمل اللي بتكون فيها التيارات قوية فبيهرب السمك للعواري بعكس ايام الفساد اللي بتكون فيها التيارات المائية ضعيفة فبيهرب فيها السمك للغزير .
9 – ايه علاقة الرياح الشمالية والجنوبية بالصيد ؟
الرياح الحنوبية او ما يسمى بالأذيب بتكون فيها الرطوبة عالية جدآ والسمك بيمتنع عن الأكل فالرياح الشمالية الغربية افضل للصيد بالمراكب
10 -الكشران والنواجل ليها اراضى معينه ولا انت وحظك ؟
الكشران والنواجل والهامور وسمان الجدرة او 111 كل دا سمك مرتبط بالشعب المرجانية بمعنى انك لو بتصتاد في ارض طينه او رمل مفيش فيها شعب مرجانية تأكد أن الكشران والنواجل مش هدفك في الصيد عكس الشعور اللي بيكون مرعاه الارض المسطحة اللي فيها أعشاب
11 - اعرف منين ان المكان اللى واقفين فيه احتمال يكون موجود فيه سمك كبير .. يعنى امتى انزل بجلب ولعف محترم ؟
في الغزير دايما تفترض ان فيه سمك كبير وفي العواري تنزل بسبحة فيها سن كبير واتنين صغيرين وتجس الارض اللي انت عليها وتأكد أن المكان اللي واقف فيه طالما جمب شعب مرجانية فاحتمال كبير يكون فيه سمك كبير ويفضل تجس نبض المكان بالجيجنج الاول لأن معروف أن السمك الكبير بيهجم على الججاية فلو فشلت المحاولات انزل بسن صغير او وسط .
12 - الفيش فايندر المفروض نبص عليه ونستخدمه ونطالب الريس انه يقف مثلا لما يلاقى سمك على الفيش فايندر لاننا غالبا مبنبصش عليه . فعايز اعرف نستخدمه ولا نسيب الريس بدماغه برضو؟
الصياد مالوش علاقة بالفيش فايندر دي شغلة الريس وغالباً محدش بيستخدمه غير في ناشيونال جيوجرافيك 😂
معلومات لازم تعرفها لو انت طالع رحلة صيد على مركب او لنش
اولاً :مش مطلوب من الريس انه يصتاد لأعضاء الرحلة ولو عمل كدا يبقى تفضل منه بس يسيب السمك لأعضاء الرحلة .
ثانياً : دور البحري لا يقتصر على انه يعمل لك شاي وقهوة وسندوتشات لأن دا دور الشيف مهمة البحري ان يساعد الريس في ربط المركب ولم الحبال ونظافة المركب ومعاونة الريس فيما يخص قيادة المركب ونظافتها لكن مثلاً كون البحري يقطع لك طعم ويربطلك السن دا بيعمله علشان انت تكرمه وانت ماشي لأن مرتبه قليل وبيعتمد على الاكرامية من الرحلات لكن لو حضرتك عاملته باسلوب هو شاف وحس انه فيه إهانة ليه ولكرامته فطبيعي انه مش هيقبل زي أي حد وانت اولهم
ثالثاً:
انت كشخص طالع رحلة صيد ودافع فلوس وتاعب نفسك المفروض تبقى عارف تربط السن وتقطع الطعم وتظبط ادواتك لأن انت مش رايح تسحب سمك وتتصور ، انت لازم تبقى فاهم اللي انت رايح علشانه ومستعد لدا وعامل حسابك الصياد الشاطر مش اللي يعرف يسحب سمكة لأن أي حد ممكن يعمل كدا لكن الصياد الشاطر اللي يعرف يستخدم السن المناسب والطعم المناسب ويلكع في الوقت المناسب ويعرف يستخدم ايه من ادوات الصيد في وقت احتياجها .
رابعاً:
انت فعلاً متأجر المركب بس دا مش معناه انك تتأجر الناس اللي بتشغل المركب وتعاملهم مش كويس علشان دافع فلوس لكن انت متأجر الوقت اللي طالع فيه الرحلة فمش علشان انت جاي رحلة مش في ميعاد مناسب او الحو قلب ومش طالع معاك سمك يبقى تطلع عين الريس والبحريه وتتزهق عليهم وتتهمهم بالفشل لأن في الأول والأخر الصيد رزق وكمان الرزق الوحيد اللي مش فيه واسطه سمكتك هتتشعلق في سنارتك .
خامسا : الريس والبحريه مطلوب منهم انهم يحافظو على وقت الناس ويساعدوهم قدر الامكان والريس بالذات عليه العبئ الكبير في الرحلة ولازم يكون صياد وفاهم كويس شغله ومظبط طرحاته وعارف هيربط فين وينقل امتى من طرحة لطرحة وعارف العمق اللي هيربط فيه ومش شرط يكون معاه جهاز أعماق لأن فيه رويسه دارسة ودايسه وحافظة الطرحات والاعماق وممكن تقولك على نوع السمك المتواجد في الطرحة وكل ريس حسب خبرته ، وكمان مطلوب منهم الابتسام في وجه الضيف ولو حد فيهم عند مشكلة خاصة مينكدش على باقي الناس اللي جايه تنبسط ويلوي وشه ويكشر في وشهم.
وفي النهاية لازم يكون في تعاون بين طاقم المركب والضيوف ويكون التعاون مبني على الاحترام المتبادل والتقدير لأننا بنسعى من خلال الرحلات دي لتغيير الجو النفسي والحالة المزاجية واشباع الهواية فبلاش تعكر مزاجك وزي مابيقولوا (مشيها في غيطك ). يعني خليك متسامح.
أحمد العوامري
تسعدنا مشاركتكم للمقال
ويسعدنا تعليقكم أسفل الصفحة
شاهد صيد أسماك البراكودا في البحر الاحمر بسبحة الجر