طريقة عمل سبحة الصيد في المالح
من مميزات السبحة انها ممكن تغنيك عن ماكينة الجر والبورد والادوات دي وطبعا انتم عارفين اسعارها دلوقتي، فالسحبة مش هتكلفك اكتر من 300 جنيه
_ السبحة نوعان: اولا السبحة العايمة وثانيا السبحة الغاطسة.
_ الاسماك المستهدفة طبعا كلنا عارف ان دي ارزاق والصيد دا الرزق الوحيد اللي مفيهوش واسطة بترمي الخيط ومش بتقول للسمك انا فلان بيه او تبع فلان باشا ، السبحة العايمة بتشتغل على الاسماك السطحية زي البراكودا والدراك والتونة احيانا والحصان وابوشراع.
لكن كل سمكة في الصيد ليها طريقه معينة وسرعه معينة للمركب. ودي اللي بتختلف من ريس لل تاني ودا توفيق ربنا لكن من خلال تجربتي ان التونة والحصان وابوشراع بتحتاج لسرعه اكتر من 12 كم في الساعة.اما البراكودا والدراك بتحتاج لسرعة بطيئة جدا اقل من 4كم /ساعه عكس الجر بالرابلات.
عمل السبحة العايمة:
الادوات
- 35 متر خيط مقاس 140.
- 10 متر خيط مقاس 120.
- حوالي 150 متر مقاس 140.
( ونقسمهم زي كدا بالضبط)
- مدور مشبك.
- 2 مدور عادي. مقاس يناسب الخيط.
- 3 كجم رصاص بلحة او ريشه وزنها 10 جم تقريبا او 15 جرام.
الطريقة: هنمسك طرف الخيط ال35 متر ال140 ونقيس 5 متر وندخل جواهم كمية من الرصاص على ان تكون المسافة بين الرصاصة والتانية 10 سم وندق على الرصاص بشاكوش برفق از الضغط بزراديه علشان يثبت كويس، وال5 متر اللي بعدهم نخلي المسافة بين الرصاصة والتانية 20 سم ونثبت كويس بالشاكوش، بعد كدا ندخل كمية الرصاص الباقية من الطرف التاني للخيط، فاضل معانا 25 متر هنخلي المسافة بين الرصاصة والتانية 40 سم ونثبت كويس وبكدا انتهينا من الرصاص.
هنربط المدورين العاديين في طرفي الخيط ال35 متر اللي اصبح عليه الرصاص.
نلف ال150 متر خيط 140 على بكره وفي نهايتهم نربط في المدور من الناحية اللي مسافة الرصاص فيها 40 سم ونلف الخيط بالرصاص على البكره لحد ما نوصل للمدور ثم نربط ال10 متر خيط120 في المدور ونلفهم على البكره وفي نهايتهم نربط المدور المشبك.
وبكدا السبحة تكون جاهزة للصيد.
ملحوظة: اثناء الصيد وانت بتلم السبحة خلي الخيط اللي فيه رصاص في جمب لوحده علشان الخيوط متتلفش في بعضها.
تعليقات
إرسال تعليق