على خد اشجار الخريف - شعر

عدّت دقيقة ف شرخ روحى
ماهزتكش
والحقيقة طالعة لابسة ..
( استرتش)
ماشية دوغرى عالسويتش
وزعت خوفها القديم
والريم طفح
من قُلتى
مش قِلتى ..
رفضت رجوعى
أو دموعى الهفتانين
على خد أشجار الخريف
د انا كنت أتقل مالخفيف
بشويتين
غيرشى بس اذاعتى شوِّت
شوِّتين
نطّقِت ريقها بحنينى
لقلب قلبى
ف أى ناحية
انتي نايمة والاّ صاحية ؟!
ياللى سايبانى "ف"حوارى ميّتة
متفتتة..
كل الطرق
البَحْر طاير"ع" الغرق
عطشان..
لـ...
قاعك
وانتي ف صراعك
توهونا ..
الليل شطوطه
والشتا بيغزل خيوطه
بأقصى سُرعة
الحياة
مرهونة..
بطقطوقة القُرب اللى جايّة..
ف شهر سبعة
ولا شهر سبعة بيجى ،
ولا يبعت...
سلام .


***

من ساعتها ولسه صاحى
قلقي بيأنب جناحى
لافتقادي للعزيمة
ليلى بيعاير صباحى
بالهزيمة،
والركود
الحياة بنت اللئيمة مشّفرانى ..
بألف (كود)
اللى قرّبلى..
ارتآنى
اتقتل فيه الوجود
دالعطور علشان يقولولها عطور
موتت كل الورود.

***
هاتى (باسوردي)
افتحينى
رتلي وردي ..
ف حيني
امنحيني الصبر يمكن
شُوقى يركن
قبري يقدر..
يحتويني
لبسيني فرو صيفك
سرحيني فوق رصيفك
يمكن اقدر أبيع عذابى
لأى شاري
كوني ليكي استشاري
أو أخصك
وانتي خُصك
مش بيبعت سقفه يَمي
طفل روحك مش بيتشعلق..
ف كمّي
وانتي لو قادرة تلمّي
اللى باقي
ف اشتياقي
واحتراقي ف ميتك
لو لمرة تقّدري..
كُوني عايش ميّتك
حتى لو ذرّة ف شعوري ناحيتك
كنتي عينتيني عُمدة لناحيتك.


أحمد عبد الفتاح العوامري