حلمي اللى قطّعتيه ....
هيوصّلك بيّا
حبي اللى قاطعتيه ..
أنا هشتريه ليّا
وأنده على بكرة ..فالفكرة تسبقنى
تسرقني رجليّا
أسأل على الميدان
ألاقيه هنا فيّا
يا معلمانى الحزن والحيرة
والتوهة
خِلّك وفي ... وانتي
خَلّك شرخلي الحلق
رديتي على قلبى ...
بابك
فكسر الحلق
متعشميش فيّا
الابن مابيرحمش أمه ف ساعة الطلق
فمتطلقيش طلقتك
وانتي اللى مُنضره
كل العرايس ورق والحلوة من بره
أمّا اللى جوا :سؤال وعلامة استفهام
مكسوفة من نفسها
وبلادك التايهة
محروجة من يأسها
لِفّي على أولك....
واتوصلي باللى انتهى
اتخلطي على نفسك
خلّي البساط أحمدى
معرفش أنا أحمدك والا أنا احمدي
معرفش ليه بابدأك
واتنفّسك دخّان
بيبان " ف" أوجاعي
فبحس بالوعكة
وامشيكي يا سكة
هوّا انتِي تبقي حياة
والا انتِي موت فجأة
والا اللي بينّا يدوب :
لاجئ
واتلم على لاجئة .
**
ياحبيبتى يا سورى
عصفوري مش طايلك
وكلامي مش قايلك
قلبي ماعدش ميدان
مفتوح لثوارك
غارك بلا عنكبوت
يحميني ف نهارك
كل البيوت بتموت
والتوت مواسمه خريف
كل اللي كان قصدى
طمعان "ف" نُص رغيف
ويشوفني طرطورك
يام الودان مقفول عليهم مزلقان
بالحب كان سورك
والذل دستورك
شديني من نفسى
القوقعة الباينة
والفاتحة للخاينة
اللى ارتضت أنهار
واستكترت لانهار
على غيطان الحب
إن كنت ف يناير هديتلك :دب
دلوقتى بهديلك
قلبي ف ورق سلفان
بس انتِي تهدينى حبة نظر وهسيس
وشويتين الحلم
وجواب بلون أبيض
مش بلون الدم
اتمخطري فيا
عِدّي الرصاص فى الجسد
يا مَشرَحَة زغردي
مين اللي فكّ الرصد
مين اللى جاب الشمس من غَربَة
مين اللي كانلك ياحبيبتى :
حضن فى الغربة
مليون طريق مفتوح
وأنا وانتي رايحين فين
بحلم
لأنى جريح
والجرح فيّا دفين
الحلم قطعتييييييييييييييييييييه
والتيه قانون بيعُم
إزاى أكون مولود
شيطاني من غير أم
يا أم الدنيا إلاي
وأنا بحرك المليان
ساعة العطش بهرب
ساعة الغضب بكتب
ساعة انفجار الوقت بلجألك
يلسعني عقرب ساعتك الخاينة
أقرب ما ليكي يهون
ياحبيبتى يام الكدب والتدليس
أنا منفعش ليكي رئيس .
أحمد عبدالفتاح العوامري
تعليقات
إرسال تعليق