لو تفكي جدايل الأوجاع ...
على كتفي اللي جاع
وتمشي
على شط الغُنا فيّا
وتكلّمي
كل السواكت اللي خلتني أصم
كل الدروب المدبوحين على حجر أٌم
كل اللي شنكلني بإيديه
لحظة خروج الأغنيات /
كل اللي ضم
مع انه ماحدش كان بيعملها
ولا باقبل
غلطان اللي بيتعشّم في مُستقبل
بوسة وداع علّمتها
ع الخد الضعيف
كسرت فروع الانتما على جزعها
ضربت حروف النور في ودني
ماعرفش مين اللي اداني , ومين اللي اخدني
جوا كراريس العيال :
جدول حساب
, استيكه , برايه غاب حدّها
ومع اني كنت اكره بيبان المدرسه
لا هربت يوم منها
ولا اتحطيت غياب
يا عشق رجليا لطريقها المستحيل
شق القدم سطرين تعب وعلامة استفهام وليل
يا أيها الحلم اللي ولّى
مين اللي صاب قلبي بشوقه
مين اللي جلّى !
مين اللي واقف ع الجسور
شايل علم!
وايه القلم على كتف واحد كان صنم ؟!
مين اللي كان دفتر حضور
ومضى لنفسه انصراف
يا أيها الصرّاف ف شركات المشاعر
أصرف لي حبه بدون إيصال
يمكن أخون الواقع الحيران
أبقى شاعر
أفهم رموز الإستغاثه
أفك شفرتها
وبدون غلاثه
أضحك لصرختها
أقدر أعيش ويّا الضلاليه
قفطان وعِمّه.. شيخ طريقه
وما حلا ليّا
ياللي انت مولود على ايدين الهموم والآه
هو ايه معنى الحياه ؟!
****
آه لو تفكي جدايل الأوجاع
على كتفي اللي جاع
تفرديها
أي فكره تفرضيها تأكديها
الضياع لو كان فريضه
كيف عليّا تفرضيها
أرفضيها ...
أي حاجه واقفه ضدي
مره تاخدي ومره تدي
قلبك اللي كان حنيّن
كان رصاصه لونها وردي.
شعر / أحمد عبدالفتاح العوامري
إقرأ أيضاً :
شعر/ أنا الغالبه شعر / أراهنك كلمات قصائد شعر حجر تفاح شعر/ ياريتك جوا كراريس العيال تعريف جديد للوحدة متزعليش جوهرة ياريته قال قّطع على جسمه الخَلَق الكعكه الفاتحه .. للخاينه سكته حُبيّه باكهرب العواميد
تعليقات
إرسال تعليق