دايخ قلبك الكعكة
ياروحنا العايشة فى الوعكة
مابين جبهات ،وبين ميادين
باسم الدين ،
واسم سياسة خبّاصة ،
وناس تايهين
حواريكى
متجمعهمش
متدمعهمش ...
عينك وانتي وحديكى
دموع فياضين
باسم القهر والفقرا
وناس عايشين بلا أعين
مابتشوفيهمش
ولا واحد فى يوم عازلك
جاز لك تمنحينى الصمت
فعنّك .... صُمت
عن الضحكة
ياروحنا العايشة فى الوعكة
داااااااايخ
قلبك الكعكة
مابين أخوان ،وسلفيين ،وناس آسفين
وناس إنقاذ
مفيش بكرة ومفيش انجاز
ضمير وطنى ،وعلماني
وأنا المدبووح بلا سكين
فأحوالك مألمانى
ومتبعتر
ومتوجه إلى قبلة بلا محراب
فى بحر وسيع
بلا أبواب
وأنا المِتصاب ومش بانزف
ايديا وساع
ومش بغرف
وعودى شباب ومش بعزف
حكايتك ليه
على لسان الغُرب
تتحكّىَ؟!
ياروحنا العايشة فى الوعكة
دايخ قلبك الكعكة
سنين عدّوا عليكى عجاف
وأنا عمرى ماكون (يوسف)
لأنى بخاف
بحس ف ضحكتك ليّا بإستلطاف
ومش بطمع
وانتي هناك بتتصلبى
وكاااااااام جلاد
مسلّط سوطه على ضهرك
ولا واحد دفع مهرك
ولا دموعك
بقت تتشاف
كام ورطة وكام عركة
ياروحنا العايشة فى الوعكة
دايخ قلبك الكعكة
مابين دستور،وناس بتثور ،وناس فى قصور
وناس شغّالة فى المحظور
وناس بينك وبينهم سور
وناس لقمتها دايما حاف
فى عزّ البرد تتعرى
وانتي لحاف
يغطوكي
يحطوكي فى نن العين
فترميهم فى آخر الصف
وتلطعي فوق قفاهم كف
لأنك حلم
والأحلام
تراب "ع"الرف.
شعر أحمد عبدالفتاح العوامري