حيرتك بتشوط فى القلب,
وتاكل"ف"سنان العمر,
ومتبقيّش
مع انك شايفانى
شاويش..
على بابك
وانتى مبتحقيّش....
الشوق
لفانى بطوق الحرمان المخنوق
عمّالة بتتمّشى
على كورنيش الفوق
ولكنك زودتى الحصة
وانا لسه
بتمرد على كل ملامحك
والله مسامحك
ياأم القلب الواقف على باب المعبد
بيطارد حتشبسوت
أنا أصل الموت
بيزُّق "ف"روحى
ويعافر ويّا النبض الكسلان
وان كان...
"ع"الشوق "ف" عيونك
مش بيبان
إلا ....
على عين القُلة
وانا بشرب
أشرب
طعم الحدوتة بتاعتك
بيزققنى الحب
ويخلّعنى مبادئى
ياخد أحاسيسى من ايدها
يرغمنى أطُّب
أغرق
و"ف" قلب القاع
ألقاكى شراع
بياخدنى لتحت
ويدفنى,
مطرح ما فحتّ
أزعق محتاج
وأول "م" الخوف
يمسك لى عصايته الكرباج
أحزن
عينك على ضهرى تخّبط
يتسرسب صوتك على ودنى
ـــ مش أحسن يا حبيبى نرّبط
شُنط المشوار
الحيرة "ف" عينى تظّبط
زواياها
وانا ويّاها
عمّال بتشعبط
يا حبيبتى يا أعبط ..
من روحى الطِفلة
إن كُنت انا صحرا انتِ الطَفلة
والتوربينه
وجنينة بتطرح
وانا نفسى "ف" حتة فرْح
يا قَطَر خوّاف
ماتوربينا
وتاخدنا لآااااااه
بنأجلها
ومشاعر"ف" معامل عُمرنا
بنحللها
ومُعادلة نحاول نعدلها
بنقصقص أطرافها بسكينة الصبر
الأتْلم "م" المعدَن
والشوق
عَامِل حفّاز جداً
لكن مكسوف ...
من نتيجتها
ولا طُلت المطلوب إثباته,
ولا شُوقى راضى بثباته,
ولا بكره بيرجع ويّا الساقية
اللى خلاص
خلعت جلابيتها
زهقانة من بُرود الأيام
ولا عارفة تنام
وتبطّل لّف ,
ولا قادرة كمان
على أى صيام
***
الشوق
بيسابق خطواتى
وكأنه لقلبى بيتحدّى
ولساكى
تلفيلى شوية أحاسيس
فى ورق سُلفان
- كُل ياحبيبى...
اتعشّى وافطر واتغدّى
وحبيبك لو يرضى التصبيرة
هيموت بالسكتة الحُبية
مش قولتلّك؟!!
خليكِ هناك كدا فى الحيرة
ونعيش مع بعض صُحُبيّة
أهى بتطارد أحلامى الوحدة
وفرّى أوراقك
متهزيش جِزعِك
وان شوقك تقّل على كتفِك
جَزَعِك
أرميه فى الأرض
ازقيه
زُقيه باديكى لفوق
يكبر / يتوّرد
سنتين
وبحاول أتبّعد
حُبك يرجع لى الضعفين
وكأنه..
مكتوب على قلبى ,
وفرض
لازم
يتأدى.
شعر أحمد عبدالفتاح العوامري
شعر/ أنا الغالبه شعر / أراهنك كلمات قصائد شعر حجر تفاح شعر/ ياريتك جوا كراريس العيال تعريف جديد للوحدة متزعليش جوهرة ياريته قال قّطع على جسمه الخَلَق الكعكه الفاتحه .. للخاينه سكته حُبيّه باكهرب العواميد
تعليقات
إرسال تعليق