عشر تيام
وأنا بنده , وصوتي يوقّف المركب
"ف" عرض البحر
عشر تيام .. بطول 100 شهر
لا راحة يدّي مرتاحة
ولا حتى الدموع بتنام
كأن " اسكندرية " ف "مصر"
و"أسوان " قاعدة ورا "فيتنام "
عشر تيام
وأنا بحسب كما الأيتام
ليوم عشرين
بيستنوا يدوب قرشين
معاش الأب
ورغم البعد والمسافات
وكام مِسا فات
عاش الحب
ولا هيموت
أنا بنده بعلو الصوت
عشر تيام
ومترديش
لأني "ف" جيش
ومش ملكي , ولا ملكك
بكهرب نفسي وبسلكك
وبتشعبط على سركك
أنا جمهور/
أنا مؤدي
بوقّع حلمي من يدّي
وما وصلهوش
عشر تيام
ما عارف عدّوا ..
أم عدّوش
بصيص النبض كله رتوش
حبيبي اللي وحش قلبي
مش معقول مبوحشهوش
وإيه عني وعنه يحوش
غير كوني أنا ...
جندي
***
عشر تيام
ولا حسّيت بفرحاية
"ف" رحّاية
بدوس الآه
وبتدوسني
قلم أزرق مونسني
بلون خوفي , ولون خوفها
جراح الذل مقدرتش أخففها
جراح بعدها أقوى
وكيف لجراح تداوي جراح
كيف أرتاح
عشر تيام
وأنا الغايب , ومتغيّب
وانا اللي عليه بيتعيّب
وأنا طيّب
رضيت يغلبني برّايا
فيخجل مني جوّايا
عشان طيّب
رضيت ألبس قوانينها
وادوس فيا قوانينك
رضيت أعرف عناوينها
وأشطب كل عناوينك
لكن عارف:
على عيني , وعلى عينك
نغيب عن بعض
عشر تيام.
***
عشر تيام
وكل مافيا متباشر
و"ف" ضلوعي ألم ناشر
بينشرني,
بيغسلني,
ويعصرني,
وينشرني ...
على حبل الجيران نوبة
و"ع" الأسفلت 100 نوبة
كما طوبة
خلاص ضلت عن الصحرا
كما المطرا
تتوه في البحر
وتدوّر على نقطة
تكون ساقطة / على اليابس
وهاتك حفْرْ
موصلتشي لقاع الأرض
مصليتشي السنن والفرض
كأني طرد
بريد سافر
عشر تيام ...
وما وصلتش
ولا اترديت لأحبابي
شوارع قايدة "ف" كعابي
بتاكل أكل
حلال القتل
بلا ... ديّة
روحي كالمعديّة
موج الحب رجرجها
وكل ما عشته من عمري
"ف" لحظة قلبي أخرجها
بعيد جداً
ولا معدن بيتحمّل
ومين بس اللي هيكمّل ..
بعيد عنّك
***
عشر تيام
وأنا وصحابي كالغُربا
لبن "نيدو"
دخل قربة
لا هتضره ,
ولا تفيده
وفينا تخض
نناديها ومش بترُد
ساعات بتعض افكارنا
وساعات بتشدّ
حبال الود
تتفرتق
ونتفرق
عشر تيام .
***
عشر تيام
تبلّ الآهة بي ريقها
كِتير أحلام
لكنّي إزاي أحققها؟!
بلاد الله
أغرّبها وأشرّقها
دموعي تشُق لي حيلي
لكن وياكي منديلي
بدوق الشوق "ف" ترحيلي
وأنا بلحس دقايقها
كِتير أوهام
على كتفي معلّقها
بشيل وحدي بنادقها
ومش عاجب
عملت معاها 100 واجب
"ف" محرابها بقيت راهب
ومش بتحسّ
معاملتها معايا العكس
أحنّلها ... تعذّبني
أغنيلها ... تكدّبني
وأنا اللي حلفت اعيّشها
بتبعد جلدي عن ريشها ..
بقسوتها !!
أصون عيشها وكسوتها
وأصون الدار
وكام مشوار
بيتمدوا
وبيهدّوا ولا يعدّوا
أحمد عبد الفتاح العوامري
شعر/ أنا الغالبه شعر / أراهنك كلمات قصائد شعر حجر تفاح شعر/ ياريتك جوا كراريس العيال تعريف جديد للوحدة متزعليش جوهرة ياريته قال قّطع على جسمه الخَلَق الكعكه الفاتحه .. للخاينه سكته حُبيّه باكهرب العواميد
تعليقات
إرسال تعليق