يا صبية
نفسى أكتبلك جواب
بسّ فين البوسطجية؟
يوصّلولك
قلبى داب
ولو ودانك لسّه فيكى
يسّمعولك
صوت عصافير الهوى
بيصوصولك
اعذرينى
رغم طول ايدى
قالولي عنها عاجزة
كتبونى عقود
لو صدى صوتى يعود
لو تقوم "ف" مشاعرى هزّة
يقفلوا على قلبى رُزّة
ويمنعونى..
انى أحبّك
يرغمونى ..
أنى أسبّك
وبسكاكيني اللي تالمه
اغزك الف غزه
ألف ميت مليون مُؤاخذه
السلاح
ارتاح شوية "م" السخانة
واحنا كيّفنا الكرامة على المهانة
بعد طابا
إحنا شّربنا الديابة الاستكانة
وانتى عايزة..؟؟!!
عايزة مين ؟
الميّتين ؟!!
انتي فكرك
إن نخلك
لسّه عالى
دانتي سخلك
زّي عنزة
وآااااااااااااه يا غزة
هيا المعزّة بيشتروها؟!!
ويوزعوها فى القزايز
ولاّ دم ؟!ّ
زىّ أىّ
أبو، وأمّ
احنا جايز
حبنا زايد لحده
فاتقلب طبعا لضده
و "ف" بلدنا الحيط يلّم
كلنا رافضين نشّم
اتولدنا
بدون لسان
فهّمونا الدنيا دون
ومفيش مكان
غير للجبان
واحنا أسياد
مين يمّثل
واحنا أول مين يكّسل
ودن طين
والتانية زفت
السكك واخدانا left
يا ريسان اللفت
يا كام مليون
وسّنة
هيا المحنّة
بيشتروها..؟!!
أحمد عبدالفتاح العوامري