أهي جات
ومعاها صاحبها الألمنجي المتعنتر
مع إنّك رايداها تشقّر
كل ماينوي الشهرينفّض جلابيته
ويسيب كوباية الشاي
و الباب مفتوح
وإنتي بتستني الصاحبة الوجاعة
اللي لا كانت خدّاعة
ولا جاتلك من غير ما تقول
ولو خدعت نستنى المحصول
ونحضر "ف" شوايل الخيش ونخيّط
ونعيّط "ع" البذرة المتخبيّة
"ف" بطن النبع
وأقولّك سبعة تقولي دا سبع
هي الشمس تطلّع إيه ؟
غير صبح
وبذراية القمح تطلّع إيه ؟
غير قمح
مع إنّه "ف"لم المحصول
ح تجني لوحدك
والمنجل هتعلّم "ف" أدك
هشوف بعيوني الجرح
وهعدّ عليكي الأنّات
أهي جات
زيّ القطر تدوس على ضهر فلنكات
والقضبان تتألم
مع إنّها ما تحسّ بطعم وجودها
إلاّ "ف"دوسة القطر
ماهو وحده اللي مضلل على قلبها
لمّا الشمس تشدّ
وحده اللي ايديه بتمدّ
يحضنها بقوّة
ولا ينظر لوراه
لو مهما النيل أغراه
...مع إنّها
هيّ اللي بتقطع نفسه
"ف" المشي بسرعة
وهوّ اللي مسخّنها
ومزوّد شوقها
تنزل "ف" الترعة
أهي جات
الغالية وأعزّ اصحابك
بمجرد ما تسلّم
ترعش لك أعصابك
وإنتي "ف" حضنك وخداها
لفّاها "ف"ملايتك
كلّ شوية تبصيلها
حسّاها مرايتك
ومع إنّك بتحبيها
مستتقلة ضيافتها
كارهة الأيّام اللي معاكي قضتها
ولو غابت
تبعتلك "ف" غيابها الحكايات
ودلوقتي
أهي جات
بتخبط على روحك
بتقولك :
سلامات .
أحمد عبدالفتاح العوامري