غطي الأيام قبل تبرد
أكرش أحلامك بالمبرد
عرّي الأوجاع
خليها تكشّ
البس كام وش
و"ف" وقت الغش
اطلع لاول
اسرق من عمرك عمنول
أكاذيبك يمكن تتأول
تصبح أسطوري
وليك وزنك
الكل "ف" ضهرك منحاز لك
كلّه بيتفزلك
بتدفع للأيام كرته
ومتمرّش
أحلامك دايما بتكلّش
أوجاعك منك مّتكلّش
حزنك متفصل متزايد
بتزيد سَنة بيزيد سِنّه
يتوفر قبل ما تتمنى
***
دمّك من دمّي
فلو شِلت دموعي "ف" يوم
سَمّي
تنزل على فمّك من فمّي
تفتح متاهات , فيزيد همّي
ريِّل على كُمّي
وميهمّش
ما الحب الساخن متكرمش
من يوم ما مشيت على أوتاره
اللحن التايه فين داره ؟!
فين لإتجاهين اللي إختاروا
كونهم يتلاقوا
يكون الوعد
فين المحراب اللي اتأسف
لأداة الفرض؟!
وفينها الميه اللي بتهوى
خيانة الأرض ؟!
***
خلصانة الأيام
زي الـ.....
نربط بتحل
بتزيــــد , وتقل
وهياها
آهة بتتمرجح مع آهة
ولا عاد أستاذ يتهجاها
و"ف" عز الشمس
ما رايحة
ورا ضهر الأيام
نوّام
الضل
نايم زي عيدان الشوق
لمّا يغيب اللي بنشتاقله..!!
بيعدوا الأيام برزالة
ويتّاقلوا
فالهمّ يملّ
يسرقله
شوية وقت
وهاتك فحت
حكايات
خلصانة
مش مستاهلة صيانة
متصانة"ف"جوف
لقليب
"ف" بند حاجات
بتدوّر على ترتيب
ك ر ا ك يـ ب
كراكيب
حجيلنا يا خالة
حتجيلنا الحالة
نتعصّب , نتخشّب
نحسب في الأيام المرّة
نضرب
وجداول الضرب
لا تشبع ضرب
ولا تكلّ
تايهة الأرقام مع بعضيها
"ف" صحن الأوجاع
والليل المتخبّي "ف" وشّي
بكرش , وجوّاع
ومعلّق 100 كوبري ____ لبكرة
وإنت زيّ ما أنت
بتدفع للأيام كرتة..
ومتمرش .
أحمد عبدالفتاح العوامري