الأحلام الكَحله
(عطشان للقول يا مداين خرسا)
ومستنى الفُرصة
تتكعور جوايا،
وتلملم تفاصيلها الكهلة
تُدخُل "ف" شقوق الروح
على غفلة
تتشعبط
"ف" شوارع الرحلة
وتدوّب "ف" بقايا المرسى
وعطشان للقول
يامداين
خرسا
وحروفك بتجُر "ف" بعض
على قدمك شايلانى
لتااا
اا
اا
ااسع أرض
والله إن كان حُبك
فرض
ما هحبّك أبداً ،
ولا "ع" الماشى , ولا جداً ,
ولا خالص
أصل أنا مش غارس سكّينك
"ف" ملامحى وساكت ،
ولا ناكت بوزى"ف" وش ترابك ،
ولا هدبل...
قدّام مِسكِينك
ولا يمكن اكّشّ
من مليون قرصة
وعطشان للقول
يا مداين خرسا
عطشان يا مداين
ومدّاين والله بعطشى
وياريتك كُنتى وزنتى الحِسبة
أو حتى رميتى"ف" جسمي الحصبة
أو كانت أمى مش خِصبة
أو حتى طالبتى بطرشى
عطشان للقول
فقوليلى : ادفع فين البلصة ؟
يامداين خرسا
عطشان والميه "ف" إيد مين ..؟!!
معقولة
ربنا مباركشى
فى الأحلام الفدادين
طاب طرحِك فين ؟!!
يام السُباطات المدلدلة
على كّف الوَد
معقول يتشعلق فيكى الوِدّ
وتخلعى جلابيتك !
ترميه فى اليّك
يفضل فى الدايرة بيترّك
الله
على طعم الشّك "ف" روحك
بمفكى
قال يعنى مش رافضة أقول
والحجة
مش لاقية سيولة
طيّب ما تفُكِّى
ولاّ مفيش فى البورصة..!!
يامداين خرسا
عطشان للقول
والعطش مدلدق على بطن الكّف
والله هموووووووت
قبل مايجى الدور
فى الصف
والناس كلها هتموت
قبل مايطلع منك
حرف
نصبح كالصلصة
يامداين خرسا
عطشان للقول
مليّت من حُزنى
ولا عايزك غير تقوليلى :
ليه ابن الحُسنى
مفقدش المفعول؟؟؟
أحمد عبدالفتاح العوامري
تعليقات
إرسال تعليق