على خد أشجار الخريف

عدّت دقيقة"ف" شرخ روحى
ماهزتكش
والحقيقة طالعة لابسة ..
( استرتش)
ماشية دوغرى "ع" السويتش
وزعت خوفها القديم
والريم طفح
من قُلتى
مش قِلتى ..
رفضت رجوعى
أو دموعى الهفتانين
على خد أشجار الخريف
دا نا كنت أتقل "م" الخفيف
بشويتين
غيرشى بس اذاعتى شوِّت
شوِّتين
نطّقِت ريقها بحنينى
لقلب قلبى
"ف" أى ناحية
انتِ نايمة والاّ صاحية ؟!
ياللى سايبانى "ف"حوارى ميّتة
متفتتة..
كل الطرق
البَحْر طاير"ع" الغرق
عطشان..
لـ...
قاعك
وانتِ "ف" صراعك
توهونا ..
الليل شطوطه
والشتا بيغزل خيوطه
بأقصى سُرعة
الحياة
مرهونة..
بطقطوقة القُرب اللى جايّة..
"ف" شهر سبعة
ولا شهر سبعة بيجى ،
ولا يبعت...
سلام .

***

من ساعتها ولسه صاحى
قلقي بيأنب جناحى
لافتقادي للعزيمة
ليلى بيعاير صباحى
بالهزيمة،
والركود
الحياة بنت اللئيمة مشّفرانى ..
بألف (كود)
كلّ اللى قرّب لى..
ارتآنى
اتقتل فيه الوجود
دالعطورعلشان يقولولها عطور
موتت كل الورود.





***
هاتى (باسوردى)
افتحينى
رتلى وردى ..
"ف" حينى
امنحينى الصبر يمكن
شُوقى يركن
قبرى يقدر..
يحتوينى
لبسينى فرو صيفك
سرحينى فوق رصيفك
يمكن اقدر أبيع عذابى
لأى شارى
كونى ليكى استشارى
أو أخصك
وانتِ خُصك
مش بيبعت سقفه لَمى
طفل روحك مش بيتشعلق..
"ف" كمّي
وانتى لو قادرة تلمّى
اللى باقى
"ف" اشتياقى
واحتراقى "ف"ميتك
لو لمرة تقّدرى..
كُونى عايش ميّتك
حتى لو ذرّة "ف" شعورى ناحيتك
كنتى عينتينى عُمدة لناحيتك.


أحمد عبدالفتاح العوامري
.

 إقرأ أيضاً : 

شعر/ أنا الغالبه   شعر / أراهنك    كلمات      قصائد شعر    حجر تفاح   شعر/ ياريتك    جوا كراريس العيال     تعريف جديد للوحدة      متزعليش     جوهرة      ياريته قال       قّطع على جسمه الخَلَق      الكعكه       الفاتحه .. للخاينه     سكته حُبيّه      باكهرب العواميد