سنة خدمة

 

سنتك ..
وخديها
وخدي حقك مني..
.. بالجملة
سنة خدمة
كاملة ومكتملة
عامليني أوحشها معاملة

***
ارميني "ف" ملعب كباراتك
يشوطوني بالطول والعرض
قيمة الإنسان فيه كام نجمة
في الصورة
بنوحّد هدمة
وأنا وحدي الواقع ..
"ع" الأرض
كتّافتي أنضف "م" الصيني
خدي دمّي براحتك
مُصّيني
مش هطلب مرّة تحسيني
وياريتك بس حبال الودّ
تقصيها
سنتك .. وخديها

***
خلّعي أسنان الشوق فيّا
مش ابنك لما تقسي عليّا
وتطبطبي ع اللي ما يستاهل
خدي بالك مني أنا مش ساهل
مش حقبل أبقى معديّة
ولا كوبري عليه
 كبارك ماشيين
بيّاع لو كلّ الناس شاريين
ببلاش وبدون أيّ مقابل
سنتك , وخديها
وفي الآخر
يمكن نتقابل

***
دا أنا يوم ماخترت أكون خدامك طول عمري
رفضتي
دوستي على رقبتي
بدون معاناه
سبتيني شريد "ف" شوارع الآه
أما أنا دلوقتي بلا مبالاه
هرميلك حبّك وهدومك
لا تلومي عليّ ولا ألومك
منّك لله
***
"ف" بحارك عمت بدون مرسى
لا عرفت أخون , ولا حتى أنسى
ان انت لدمّي ...
مختلسة
مع إنّي مكنتش يوم مذنب
فسيبيني لوحدي عشان أحسب
كام يوم عدّى من سنة ممتدة
بدون آخر
لو قلت:حبيبتي
هكون ساخر
منّك باتهكـّم
يا شوارع فضيت م الذمّة
وفي النفس النفس بتتحكّم
على قد لساني ما طول ساقي
أنا مجبر إني اكون
 أبكم .

أحمد عبد الفتاح العوامري

 إقرأ أيضاً :

شعر/ أنا الغالبه   شعر / أراهنك    كلمات      قصائد شعر    حجر تفاح   شعر/ ياريتك    جوا كراريس العيال     تعريف جديد للوحدة      متزعليش     جوهرة      ياريته قال       قّطع على جسمه الخَلَق      الكعكه       الفاتحه .. للخاينه     سكته حُبيّه      باكهرب العواميد