حبيبتى بتدوس "ع" الألم ..
ينداس
وانا بدوس "ع" الحبر فى الكراس
الراس بتقلع شعرها ..
وترميه
الحلم بتغميه
القلب بتغُميه
ياللى انتي عايشة :
بتسمعي ، وتشوفي ، وتقولي
لكن مفيش احساس.
****
الشعر لو علمك
كان علمك تطري
تنزّلى الاحمال .. من على ضهري
مش تدفعي بيّا
"ف" بحر مش عارفاه
أو تدفعي فيّا :
شويتين الآ ه .
***
دوسي على الأحلام
هانام بدون ازعاج
لحضنك البردان .. العمر مش محتاج
الاحتجاج مسموح
لكني مش مدبوح
ولا هقبلك تبقي :
صبارة على قبري
أدعيلها بالراحة
يا شجرة رغم الخضار
مش جايبة تفاحه
شحاتة سرّاحه
بتسرحي بيّا ،
وبتسرحي فيّا
بس الحنين معقود
والعقدة مش خيّة
***
الصرخة طالعة بذكريات ياما
أيام ماكنتي "ف" بحرى عوّامة
دوّامة بتشدني لجوّه
دلوقتي انتي يدوب :
دخان بيطلع من حجر تفاح
والطعم مش هوّه .
شعر أحمد عبدالفتاح العوامري
إقرأ أيضاً :
شعر/ أنا الغالبه شعر / أراهنك كلمات قصائد شعر حجر تفاح شعر/ ياريتك جوا كراريس العيال تعريف جديد للوحدة متزعليش جوهرة ياريته قال قّطع على جسمه الخَلَق الكعكه الفاتحه .. للخاينه سكته حُبيّه باكهرب العواميد
تعليقات
إرسال تعليق