أنا فيّا شئ لله
بعكّز الأيام فتتعكّز
وساعات بتكسر قُلة المشوار
تعطش مواسمى
ياساقية ياللى قرينا أنا وانتي :
فاتحة عمار
ليه بصحبتنا
تُكفري وتخاصمى ؟؟ّّّّّ!!!
تشوحى شوية ضفادع
ميخافوش وميختشوش منى
يااااااااااااااااا.
ح ل م بتعجّز
أول مابكتب (حاء)
اللام متتلمش
الفرق إيه :لمّا يقولولك نعم
وأما يقولولك حاااااااااااااااء
وانت بتحفظها
كيف ما تحفظ مية الري القنايا
يالا بينا فـ يالا بينا
وهيّا دى مصيبة الحكاية
ليه منرسمش بايدينا
سكّتنا ؟
ونعُض ايد اللى لعب بضحكتنا
واللى كان سيفنا وموتنا
بعتر "ف " دمى بارود
والعود نشف منى
أنا فيّا شئ لله
هارقص وحزّمنى
الصبر هازمنى
وسياستك العوجة فى الهوجة تهدمنى
بعكّز الأيام
وكيف بتتعكز ؟!!
ولفيف من الأوليا
فوق المقام بالسِّبح
مين اللى كانلك ضيا ؟؟؟
ومين دبح : شمسك ؟؟؟؟؟!!!!!!!
يا هل ترى بتفهمى
والا انتِي مُخك سرح ؟؟
جَلح النظر من ضرفتين عينى
أنا مش شايفكم
ياللى شايفينّى
(مُنقاد ) لُكم
ضلعى اللى سوّس في انتظار الفرج
مَنقد لكم
بتمدوا ايدكم فيه
ساعة الشتا مايخش منادركم
مع انى أعمى وغبى
"ف" وشكم
مابشوفش مناخيركم
***
أنا فيّا شئ لله
درويش بدون ماحفظ ..
ولا آية فى القرآن
بالتمتمة والبلبلة بتُفُرج
عكازى لاعرج
غانينى عن سؤال الردى
يدوب شايلنى
"م" المردغة "ع" الأرض
والسير على أربعة
"ف" بلاد بتهوى الزيف والكدب والإمعة
أنا شوك "ف" حضن الورد
فان كنتى مستعجلة
شدّى الرحال
القطر مستنى
والشنطة جنب الباب
بتوّدع الأحباب
وتوّدع الركنة
أنا فيّا شئ لله
وعفاريت كتير ساكنة .
أحمد عبدالفتاح العوامري
شعر/ أنا الغالبه شعر / أراهنك كلمات قصائد شعر حجر تفاح شعر/ ياريتك جوا كراريس العيال تعريف جديد للوحدة متزعليش جوهرة ياريته قال قّطع على جسمه الخَلَق الكعكه الفاتحه .. للخاينه سكته حُبيّه باكهرب العواميد
