حزن القصيدة -شعر- أحمد العوامري

 اعلانات 
يمكن عينيكي تكون سكون البحر في الصيف الغلط 
متبدليش المواسم 
متصحيهاش بالليل،  
ومتخنقيش الحلم بالمتاهات 
اعلان ظهر :
[ "من غير أنا "..  كتاب جديد،  مفيهوش بكاء الذات ]
الاعلانات بتفط في الملكوت 
وتبيع صداها لأي حد غريب 
طاب مين بيعرف ايه نهاية الموت؟!! 
طالعه الغناوي بتنفخ الجلاليب 
موال بيكتب نفسه ويتحشر في الناي 
ف ازاي عينيكي تكون سكات البحر في الصيف القلق
وانتي هروب الأسئلة والممكنات 
اعلان ظهر: 
[ للبيع 
مدينة كلها شعرا،  والشعر أرخص من بلاش بكتير ]
متعلموش ع ال  x
هيتولد غيرها 
كل القصايد نسيت التعبير 
حزن القصيدة مالوهش علاقة بالأنات 
حزن القصيدة ف موت معانيها 
ميهماش ان كان بكاها لذات
 ولا لمجموع ممنوع يغنيها. 
اعلان ظهر :
(الصبر موجود عندنا بدون تشطيب) 
قال يعني هيفيد البكا ف حاجه
خلصت عماير صبر ومكانش له تفسير
ثبت روحي بمسمارين فيا
وحلفت اني ما روح ولا اجي
وعملت مني نار وتلاجه
فضلت مستني قتلني العطش
واللي جري حصل بواقي البير. 
يمكن عينيكي تكون ضياع البحر ع الشاطئ
وانتي ضياعي وقوتي وقوتي
ازاي قدرتي تهزي ملكوتي
وان قولت باحلم بيك تحت الميه مش خاطئ
 اعلان ظهر 
(قلبي انكسر ومحتاج له جبيرة وشاش  ) 
ومين اللي قالك تعشق الدنيا 
عايز تغش ازاي من الغشاش 
قلبك يدوب محتاج لتأشيرة 
قلبك يدوب محتاج يتحنى مش يتحني
حاول لوحدك تنسى او تبعد 
البحر مش بحرك والحب مش ببلاش 
اعلان ظهر 
( حد عايز ينتحر؟! ) 
" من غير أنا " كتاب جديد مفيهوش بكاء الذات 
للبيع مدينة كلها شعرا،  والشعر أرخص من بلاش بكتير 
الصبر موجود عندنا بدون تشطيب 
قلبي انكسر محتاج له جبيرة وشاش 
حد عايز قلب ابيض وببلاش.؟!

أحمد عبد الفتاح العوامري

إقرأ أيضاً : 

شعر/ أنا الغالبه   شعر / أراهنك    كلمات      قصائد شعر    حجر تفاح   شعر/ ياريتك    جوا كراريس العيال     تعريف جديد للوحدة      متزعليش     جوهرة      ياريته قال       قّطع على جسمه الخَلَق      الكعكه       الفاتحه .. للخاينه     سكته حُبيّه      باكهرب العواميد